өткізу тәртібі

(Пропускной режим)

күзетілетін аймаққа (әскери бөлімге, мекемеге, орынға, жабық түрдегі кәсіпорынға, т.б.) кіру мен шығудың, түрлі заттарды (жүктерді) кіргізу мен шығарудың, сонымен қатар жеке құрам мен келушілердің күзетілетін аймақта болуының тәртібін анықтайтын, міндетті түрде орындалатын ережелер жүйесі. Ө.т-нің негізгі мақсаты — мемлекеттік және әскери құпияны, жоғары қырағылықты және әскерлердің жауынгерлік әзірлігін сақтауды қамтамасыз ету. Ол қандай да бір бақылау түрлерін (әдетте, рұқсатқағаз, жеке куәлік және т.б.) және тұлғаларды (заттарды, жүктерді) тексеру ережесін қолданудан тұрады. Ө.т-не сәйкес ережелер, басшылықтар, бұйрықтар, нұсқаулар белгіленеді. Ө.т-ін ұйымдастыру жауапкершілігі әскери бөлімнің, мекеменің, әскери оқу орнының және т.б. командирлеріне (бастықтарына) жүктеледі. Ө.т-ін күнделікті сақтау үшін кейбір жағдайларда арнайы бөлінген тұлғалар белгіленіп, бақылау-өткізу пункті құрылады. Сондай-ақ мемлекеттік шекараны күзету жүйесінде де одан заңсыз өтуге және шекаралық аймақ пен шекаралық алқапта бөгде адамдар болуына тыйым салу үшін Ө.т. орнатылады.